Eph 4 | ASO | STEP | Ne'mine o neine' nenako nemu' nene lingine O'moso'mo elese molo-lengedo ei' ve lo lengele'mize molavete e'metikevo lisihe' iline' monovolokovo' lisihe' igi e'meti vivi' vivi' igi minilizaho lo agae lo naza Guvelesi ve'mi goboni ve minuvongumu' nala' numungu' huli-nidikevo minuve'mine nolo-lingimuve.

Ephesians 4

O'moso'mi Sikalahu' Ne'mo Do Hamo' O-ledosa Do Kilisito' Oko'no Ne'mine Lolo' O-ledavo Noningukovo' Nene Hongu Lo Minelone Lo Paulo' Lo-ngimine'

1 Ne'mine o neine' nenako nemu' nene lingine O'moso'mo elese molo-lengedo ei' ve lo lengele'mize molavete e'metikevo lisihe' iline' monovolokovo' lisihe' igi e'meti vivi' vivi' igi minilizaho lo agae lo naza Guvelesi ve'mi goboni ve minuvongumu' nala' numungu' huli-nidikevo minuve'mine nolo-lingimuve. 2 Lingine ne'mine idi nivilizanguti' nene lutine've di dizami loposo lengemeni dameni di otuhi minanguti' O'moso'mo do gatine lo-lengedavo nizadokovo' nene mini ato ato' inite' lengita soto' neivo ma hongu li mini lengi' okodingu' nene eze izebolo' molali inite' anivo anivo ge gizebolo' molali inite' ivo ivo li minilizangumu' nene gili hulisa asi gosele' lengebelamivo lutine ge neme ne geme livo' minilo. 3 Ido' ne'mine igi mini O'moso'mi Sikalahu' ne'mo do hamo' o-lengedavo hongu lo minali'mi gesi mingu' nizanguti' nene limi vami lutine di hamo' igi a'mine monovolo' nene amuzo mili e'meti vi minilo. 4 Kilisito' evenele mukito' laza nene Kilisito' oko'no hamokuti' ne'mine nonivo O'moso'mi Sikalahu' hamo' ne'mo nene leli' mukiku' nene minevo dovo' ogo neive. Ido' a'mine'mine ogo O'moso'mo do lamine' o-lengedelove lo elese molo-lingididoti' lingine gili ele'vole' igi a'mine gizebo igi minani' initekumu' nene laza mukito' a'minemukovo' gele ele'vole' ogo gizebo ogo none. 5 Ido' Guvetesi ve nene hamokovo' neivo eito' gele ele'vole' une' nene mukito' gele hamo' o none. Ido' Guvetesi ve hamokumu' nene gele ele'vole' o mino mono' noso holaa' noune' nene ei' gulive hamotokovo' noso holaa' none. 6 Ido' O'moso nene mukito' meteho hamo' nene neive. Ei' neve evene' muki' nene livile' ogo osu' losa dizosa neive. Ne'mine ogo mino evene' mukiliti vovoteu' mino luteu' luteu' gono do neive.

7 Ne neiha Kilisito' aza leli' hamo hamo' lehize-ledelesa giline' votigilelo' nene leli' muki' hamo hamo' nene monoli'mi amuzo lehize-ledave. 8 Nemu' nene mono' godolou' ti' li gizi nizani' ma neive:

Guvelesi ve aza biluva've ngivile' ogosa
oto hozeuko dizo vingu' nene lovouti' galapuso ve ne'mine
do mulise molo-ngedo ngele'mizo voosa
inite' ato ato' nene ei' evenele lehize-ngidine'.
9 Ido' hoziuko dizo vine' ve li gizangumu' nene laza nadive lo gelelone. Aza nene gomu' misubouko lemosa mo misubo luloukosi homine leme pelosa dizo vine' ve lo gelelesune. 10 Ido' misubouko mene lemo ave ne'mi emeni dameni ne'mo nene misubou' ido' okulumoku' mine giki' ogo minelive lo okulumo' ningaa' none' nene ivile' ogo ido' ma ningamune' muki' nene ngivile' ogo mo hoziu' goloso dizosa minine' ve. 11 Ido' a'mine ve ne'mo inite' ato ato' monoli'mi amuzo ne'mine nene evene' linge leze nene aposolo minilizave lo lele'mize molaa' ido' linge ma eze veleuti' gamazi li soto' iga' ave polohete minilizave lo ne'mi amuzo lehize-ngedaa' ido' linge ma nene mono' gamazi lamine' nene li soto' igi li-ngimiliza amuzo lehize-ngedaa' ido' pasitoli gonou' ngele'mize molaa' ido' mono' apizi ngimaa' ilizave lo ngele'mize molaa' neive. 12 Ido' O'moso'mo ne'mine ogo monoli'mi amuzo ato ato' lehize-ledo ne'mine gonolo' lele'mize molaa' neine' nene eze aleve lelikumu' nene monoku' izipe ngomo ne'mine minikevo tilikilo' ve ingine lengele'mize gopo ilisa gotine izi soza mono' ato ato' li-lingimikevo ne'mo gamene gamene hepeli'mo pipiza' nite' do volelo' melo' oga' neine' ne'mine igi mini me monoku' volobe ido' ma monoku' me volobe li minikelizave lo O'moso'mo eze evenele nene ge hize ele' o-nede ne hize ele' o-gede li gono di'mi vi mini lengi' mulise Kilisito' oko'no ne'mine neine' nene hize ele' ikevo amuzo molo minavo lingine muki' nene O'moso neni' gipe'nemu' gili ele'vole' igi ei' monovo've nene gili vevesi minikevo ne'mo lutine do hamo' ogavo monoku' lodive igi Kilisito' emeni dameni vai' nene lengita mine osu' lilido' o minivo minilizangumu' ve lo a'mine gono nene leli' daloningumu' ve lo do va'va' o-ledo gono ato atoku' lele'mize molaa' neive. 15 Ido' mono' gono ato atoku' lele'mize molaa' neine' nene laza tilikilo' ve golosolite iga' ani' ne'mine amosa gamazi gihile laminetokovo' nene e'meto evene' lute ngemo a'mine gamazi laminekovo' nene lo-ngeme'mo vo minelone' ne'mo leze godotelo' minive Kilisitoda nene gi'mize lamine' okunivo eze emeni dameni vai' ne'mo lezela mine vai' lo neivo monoku' lodive oloningumu' ve losa mono' gono ato atoku' lele'mize molaa' neive. 16 A'mine godotelo' minive ne'mo nene eze oko'no ne'mine minunive leli' nene lingela lingela gono ato ato' limine' votigilelo' votigilelo' do molo gono lisihe' ogo nodunivo a'midoti' nene do hamo' gehepeve o-ledavo ne'mo nene a'mine oko'no ne'mine minunive mulise vai' nene monoku' naba oka' oka' o'mo vo mino mukito' nene lute ge neme ne geme lo minune' ne'mo do amuzo molo-lede'mo vo minivo minaa' noune.

Lingine Gomu' Igi Mili Monaa' Ani' Monovotine Nene Mehedine Imi Gosoho' Lengemeni Dameni Lingimido' Nene E'meti Minilizave Lo Paulo' Lo-ngimine'

17 Nemu' nene naza Guvelesi ve'mi velemu' ogo gamazi mene amuzo molo ti' lo nolo-lingimuve: O'mosomu' gilamave heta ato' ve ingine nene gihile've nomine' initekumukovo' ga'ine gilaa' nani' nenaze. Lingine engi' monovo'nido' nene gohi nge'metamilo. 18 Ingine nene lu'ningu' liti'muso ize minine' ne'mo negi hizi mini O'mosomu' gililisa ani' nene lu'ine ngi lo a'manapa ogavo O'mosolati' minevo' minevo' minaa' ngemeni dameni nene engita nomivo minaa' nave. 19 Ido' lu'ine ngi lo a'manapa ine' ne'mo nene goloso initekumu' ngovozo hilami okode'mo lanite' gelaa' neine' monovo goloso lute do goloso o-ledaa' neine' monovo muki' nene gosele' ngebelamivo vauve goloso ilisa igi mili mini inite' gohi gohi dalone li minaa' nave. 20 Ido' Kilisito' monovo've lingine gilaa' ani' ma nene lingine engi' iga' ani' ne'mine ilizave losa nomive. 21 Ei' monovo nene mo li-lingimikevo lingine ezela vi gi'mizikevo ei' Izesudati' gamazi gihile lamine' nene mo apizi lingimikeni' noloseive lo gele nouve. 22 Ido' nemu' nene lingine gomu' monovo goloso igi mili minaa' adoti' ha minine' lengemeni dameni litehe ne'mo nene leli' gote izo lele'mize goloso oga' neine' initekumu' nene umo helaa' neine' nenako nemu' lingine a'mine gomu' lengemeni dameni nene mo di hulilo. 23 Ne'mine ikevo lutine gatine've nene gosoho' ogavo mini 24 lengemeni dameni gosoho' nene di otuhi lingine nene O'moso'mi emeni dameni ne'minesi mini gamazi lamineli'mi gihile've nene di soto' igi evene' lisihe' lamine' minaa' ido' O'moso gelekele' o-do minakumu' nene lutine mili minilo.

25 Nemu' Kilisito' evenele laza okode do hamo' ogo noninguti' nene okode lingela lingela ne'mine mino vaito' bizo none' nenako nemu' mukito' lingine soza saza laa' monovo nene huli evene' ma gamazi li-ngimilizani' nene mo laminetokovo' li-ngimilo. 26 Ido' lingine inite' mamu' lingizebolo' molavo muludingu' goloso gililizani' ne'mo nene lihime lengemeline' o neine' nenaze. Lingine nene inite' mamu' muludingu' goloso gili minilizani' ne'mo Satani aza ogo do gopo o-lengedeline' aka've di ngolo' li-dikevo ogalize. Goloso gililizani' nene lengita ha minivo ho' nene lemo su'mizalize. Nemu' ehee' igi mini muludingu' goloso gililizani' nene geti di hulilo. 28 Ido' gomu' gumine daminelo' ve minave ingine idise a'mine monovotine nene hulisa lengi' adinedunu' gono laminekovo' disa inite' vise' igi minilizani' aleve hize ele' o-ngedelone' votigilelo' nene inite' pata' do soto' molalone li gono amuzo mili di minilo. 29 Ido' lengi' vetinguti' nene gamazi goloso mo keke' hamokisi lami gamazite gililiza aleve nene ngele'mize lamine' olone li eze hize ele' o-divo eze hize ele' o-divo li minaa' akamu' nene vise' igi di soto' igi gamazi laminekovo' li minilo. 30 Ne'mine igi mini O'moso'mo ei' ve lo meni hizi ve leli' nene alinge' mudise do lu' izo lele'mize eita ilingumu' ve lo noso molo ei' Sikalahu've lehize-lidine' nenako nemu' lingine O'moso'mi Sikalahu' aza nene goloso gelo muhele' ogo mineline' inite' ne'mine i-damilo. 31 Ido' muludingu' ekese' goloso gelaa' ido' muludingu' olo' laa' monovo ido' lingizebolo' molaa' monovo ido' evene' geke' goloso li gotinguti' li-ngimaa' monovo ido' evene' divi ledivi' igi ngemenga laa' monovo ido' ne'mine mana'mine monovotine goloso muki' nene ogo molo ogalone li olovo' igi minilo. 32 Ezemu' mulumo gelanivo gezemu' mulumo gilivo li mini ne nasahili' o-gede ge nasahili' o-nede li mini Kilisito' lihimetinemu' hiline' ne'mo O'moso'mo a'mine lihimetine nene mo hulo-lengedavo nizani' nenaze. Lingine a'mine'mine igi lengikumu' evene' malite goloso gili lihime dalizahe ido' lingine engikumu' goloso ma gili lihime dalizahe ilizani' lihimetinemu' nene gili huli minami ge hulo-nede ne hulo-gede li minilo.